निजी अस्पतालहरुको शुल्क पुनरावलोकन गर्न समिति गठन, समितिले सरोकारवालासँग छलफल गर्ने

चैत २, याङ्वरकफोकस / स्वास्थ्य तथा जनसंख्या मन्त्रालयले निजी अस्पतालहरुको शुल्क पुनरावलोकन गर्न समिति गठन गरेको छ । मन्त्रालयका प्रमुख विशेषज्ञ महेन्द्रप्रसाद श्रेष्ठको अध्यक्षतामा आइतबार बसेको बैठकले निजी अस्पतालहरुको शुल्क पुनरावलोकन गर्न समिति गठन गरेको हो ।

समितिमा नेपाल मेडिकल काउन्सिल, निजी अस्पतालहरुको संगठन, मन्त्रालयको गुणस्तरीय महाशाखाका प्रमुख, नीति योजना तथा अनुगमन महाशाखाका प्रमुख र निजी मेडिकल कलेजका संगठनहरुको प्रतिनिधि सहितका विज्ञहरु सदस्य रहेका छन् ।

अस्पतालहरुले प्रदान गर्ने स्वास्थ्य सेवाहरुमा बहिरंग, अन्तरंग, शल्यक्रिया आदि सेवाहरुको गुणस्तर निर्धारण, शुल्क निर्धारण, अस्पतालले आफ्ना कर्मचारीहरुलाई दिने सेवा सुविधाहरु समय अनुसार भए नभएको बारे पुनर्विचार गर्न समिति गठन गरिएको प्रवक्ता डा जागेश्वर गौतमले जानकारी दिए ।

समितिले सरोकारवालासँग छलफल गरी सेवाको शुल्क र कर्मचारीको सेवा सुविधा सम्बन्धनमा प्रतिवेदन पेश गर्ने प्रवक्ता गौतमले बताए । प्रतिवेदनका आधारणमा आवश्यक निर्णय गरेर कार्यान्वयनमा ल्याइने मन्त्रालयले जनाएको छ ।