मुसाहाङ् अम्याङ्साको हाइकु संग्रह “मुक्तु”को विमोचन सम्पन्न

चैत १२, याङ्वरकफोकस / लेखक तथा सञ्चारकर्मी मुसाहाङ् अम्याङ्साको लिम्बु भाषाबाट प्रकाशित पहिलो हाइकु कृति संग्रह “मुक्तु”को विमोचन सम्पन्न भएको छ । आज (बिहिवार) झापा दमकस्थित एस.जी. होटलको सभाहलमा याक्थुङ् साहित्यकार पुष्पहाङ् लोरिङ्देन लोवाको प्रमुख आतिथ्यतामा संग्रहको विमोचन भएको हो ।

कार्यक्रममा साहित्यकार लोवाले “मुक्तु” हाइकु संग्रह याक्थुङ् (लिम्बू) भाषामा प्रकाशन भएको पहिलो कृति भएको र उक्त कृति भित्र रहेका सिद्धान्तनत् हाइकु जापानी परम्परागत काव्य साहित्यबाट फैलिएको तीन हरफको छोटो, मिठो, कसिलो र रसिलो कविता संरचनाबद्वताको १७ अक्षरीय रुपमा ५ ७ ५ वर्णका शब्दहरुको मात्रा मिलाएर पूर्ण अभिव्यक्ति दिने स्वतन्त्र विधाको रुप रहेको बताए । उनले भने, ‘नेपाली नयाँ पुस्ताका कविहरुले वि.संं २०१९ सालमा जापानी साहित्यको स्वाद लिई लेख्न सुरु गरेको इतिहास छ तर लिम्बु भाषाबाट भने केही पत्रपत्रिकामा मात्रै प्रकाशित हुँदै आएको थियो । वि.सं. २०६२/०६३ सालदेखि नेपाली तथा लिम्बु साहित्यमा कलम चलाउन थालेका अम्याङ्साको कृति याक्थुङ् साहित्य प्रतिष्ठान झापाले प्रकाशन गरेको हो । कृति भित्र किरात सिरिजङ्गा लिपीबाट २५५ वटा हाइकुहरु समावेश छन् ।

लेखक अम्याङ्साको संक्षिप्त किरात इतिहास तथा आथरेहाङ् मुसाहाङ् लिम्बु बंशावली दस्तावेज २०७४ लगायत विगतमा लिम्बु र नेपाली साहित्यमा हाइकु, तांका, रुवाई, गजल फुटकर सिर्जनाहरु विभिन्न पत्रपत्रिकामा प्रकाशित रहेका छन् । अम्याङ्सा लिम्बू/नेपाली भाषाबाट प्रकाशित हुने नाम्गेत लिम्बुवान र पोक्लाबाङ् पत्रिकाको प्रकाशक/प्रधान सम्पादक समेत हुन् ।

कार्यक्रममा लेखक अम्याङ्साले केही हाइकुहरु समेत वाचन गरेका थिए ।

याक्थुङ् साहित्य प्रतिष्ठान झापा अध्यक्ष सेसेमी सेनाल्बोको अध्यक्षता सम्पन्न भएको सो कार्यक्रमलाई प्रतिष्ठानका महासचिव सेसेहाङ् फियाकले संचालन गरेका थिए ।