एशियाको दश उत्कृष्ट खेलाडीको सूचीमा किरण चेम्जोङ, पहिलो नेपाली खेलाडी यस स्थानमा

चैत २०, याङ्वरकफोकस / एशियाली फुटबल संघले जारी गरेको एशियाको दश उत्कृष्ट खेलाडीको सूचीमा किरण चेम्जोङ परेका छन् । नेपाली राष्ट्रिय टिमका कप्तान चेम्जोङ साताकै उत्कृष्ट अन्तर्राष्ट्रिय खेलाडीको सूचीमा पर्न सफल भएका हुन् ।चेम्जोङ यस स्थानमा पुग्ने पहिलो नेपाली खेलाडी हुन् ।

एसियाली फुटबल महासंघ (एएफसी) ले बिहीबार सार्वजनिक गरेको ‘एएफसी इन्टरनेसनल प्लेयर अफ द विक’ मा किरणसहित १० खेलाडी रहेका छन् । एएफसीले सार्वजनिक गरेको उक्त सूचीमा यूनाइटेड अरब एमिरेट्सका अलि मखौत, कतारका मोहम्मद मुन्तरी, जापानका युया ओसाको, इरानका सरदार अजमौन, सऊदी अरबका सलेह अल शेहरी, इराकका अला अलि म्हावी, बहराइनका मोहमेद मरहून, जोर्डनका मुसा अल तामरी, ताजिकिस्तानका अलिशेर हलिलोभ र नेपालका किरण चेम्जोङ छन् ।

एशियाली फुटबल संघले सार्वजनिक गरेको दश खेलाडीलाई मतदानका लागि खुला गरिएको छ । ‘एएफसी इन्टिरनेशनल प्लेयर अफ द् विक’का लागि मतदान खुला गरेको हो । एएफसीको वेबसाइटमा अप्रिल चार सम्म जो सुकैले अनलाइन माध्यमबाट आफ्नो रोजाइको खेलाडी चयन गर्न पाउनेछ ।

चेम्जोङले क्लब फुटबलमा नेपालको सहिद स्मारक ए डिभिजन लिग, माल्दिभ्सको धिवेही लिग र भारतको आई लिगको उपाधि जितेका छन् । र, त्रिदेशीय लिग जित्ने उनी पहिलो नेपाली हुन् । दुई दिन अगाडि चेम्जोङ भारतको आई लिगकै उत्कृष्ट गोलकिपर समेत घोषित भएका थिए ।