अफगानिस्तानमा अलपत्र ३४ नेपालीलाई सोमबार मात्र उद्धार गरिने – हालसम्म ९४० नेपालीको उद्धार

अफगानिस्तानमा अलपत्र ३४ नेपालीलाई शनिबार उद्धार गरेर स्वदेश ल्याइने भनिए पनि प्राविधिक कारणले गर्दा सोमबारमात्र उद्धार गरिने तय भएको छ ।

नयाँ दिल्लीस्थित नेपाली दूतावासका उपनियोग प्रमुख रामप्रसाद सुवेदीका अनुसार अलपत्र नेपाली र संयुक्त राष्ट्र संघमा कार्यरत रहेका थप नेपालीहरु विदामा नेपाल आउनको लागि शनिबार ल्याउने तय भएको थियो ।

फर्कदा दुबई हुँदै आउनुपर्ने र त्यसका लागि थप पीसीआर गर्नुपर्ने भएपछि उद्धारको काम दुई दिन धकेलिएको सुवेदीले बताए । अलपत्र नेपालीहरु र अन्य नेपालीहरु सोमबार काबुलबाट इरानको राजधानी तेहरान, त्यसपछि दुबई हुँदै काठमाडौं आउने तय भएको छ ।

अमेरिकी सेनाले २० वर्षपछि अगस्ट ३० मा अफगानिस्तान छाडेपछि त्यहाँ नेपालीसहित विदेशी नागरिकको सुरक्षालाई लिएर प्रश्न उठिरहेको छ । परराष्ट्र मन्त्रालयका अनुसार अफगानिस्तानबाट हालसम्म ९ सय ४० नेपालीको उद्धार भइसकेको छ ।