पाँचथर – अविरल वर्षासँगै आएको बाढी पहिरोमा परि पाँचथरमा २७ जनाको मृत्यु भएको छ भने ३ जना बेपत्ता भएका छन् । जिल्लाको मिक्लाजोङ गाउपालिकामा मात्रै बाढी पहिरो र खोलाले बगाँउदा २१ जनाको ज्यान गएको छ । यो सँगै जिल्लाका विभिन्न स्थानमा बाढी पहिरोमा परी ज्यान गुमाउनेको संख्या २७ पुगेको हो ।
हिजो मंगलवार रातीदेखि आज वुधवार बिहानसम्म यत्तिको संख्यामा मानवीय क्षती भएको हो । जिल्लाको मिक्लाजुङ गाँउपालिकाका अध्यक्ष अमर माखिमले जानकारी दिए अनुसार मिक्लाजुङ कुरुम्वा ५ मा मात्रै १५ जनाको मृत्यु भएको छ भने २ बेपत्ता छन्, यस्तै खोलाले बगाँउदा वडा १ र २ का ४ जना, वडा न. ४ रबिमा खोलाले नै बगाँउदा १ जना बेपत्ता भएका छन्, यसैगरी वडा न. ७ लिममा २ जनाको ज्यान गएको छ ।
त्यस्तै, मंगलबार राती पहिरोमा पर्दा फिदिम ४ मा २ जना, फाल्गुनन्द गाँउपालीकामा ३ जना र कुम्मायक गाँउपालिमा १ जनाको मृत्यु भएको जिल्ला प्रहरी कार्यालय पाँचथरले जनाएको छ ।
जिल्लामा बाढी पहिरोमा परेर ज्यान गुमाउनेको संख्या अझै बढ्न सक्ने पाँचथरका प्रमूख जिल्ला अधिकारी पुण्यप्रसाद ढकालले जानकारी दिएका छन् ।
बाढी पहिरोका कारण सञ्चार सेवा अवरुद्ध भएकाले क्षतिको विवरण संकलन हुन नसकेको हो । बाढी पहिरोले दर्जनौ घर परिवार विस्थापित भएका छन् भने विस्थापितहरुको विवरण संकलन हुन बाँकी छ ।
Discussion about this post