नेकपा एकीकृत समाजवादी र चीनबीच वार्ता

नेकपा एमालेबाट छुटेयता पहिलो पटक नेकपा एकीकृत समाजवादीका अध्यक्ष माधवकुमार नेपाल र चिनियाँ कम्युनिष्ट पार्टीबीच वार्ता भएको छ ।

शुक्रबार भएको उक्त वार्तामा अध्यक्ष नेपालले पार्टीको तर्फबाट आफ्ना कुरा राखेका थिए । चिनियाँ कम्युनिष्ट पार्टी (सीपीसी)को अन्तर्राष्ट्रिय विभागका उपमन्त्री छन चौलेसँग भएको भर्चुअल वार्ताका क्रममा अध्यक्ष नेपालले एक चीन नीतिप्रति आफ्नो पुरानै प्रतिवद्धता दोहोर्‍याएका थिए।

समाजवादीका नेता एवम् विदेश विभागका सदस्य मिलन तुलाधरका अनुसार यो छलफल चिनियाँ राष्ट्रपति सी चिनफिङको सत्तारोहणको आठ वर्ष पुग्न लागेको सन्दर्भमा भएको हो।

समाजवादीसँग भएको यो छलफलका चिनियाँ कम्युनिष्ट पार्टीका वरिष्ठ नेताहरु सहभागी थिए। राष्ट्रपति सी सन् २०१३ मा पहिलो पटक राष्ट्रपति बनेका थिए।

त्यसयता उनले आफ्नो दुई कार्यकाल पूरा गरिसकेका छन्। चीनमा साधारणत: एक व्यक्ति दुई कार्यकाल मात्रै राष्ट्रपति हुन पाउने नियम थियो। तर सीले आफूलाई अनन्तकालसम्म राष्ट्रपतिमा कायमै राख्ने गरी विधान संशोधन गरिसकेका छन्।

उक्त वार्ताका क्रममा अध्यक्ष नेपालले चीनले नेपाली जनतालाई कोरोनाविरुद्धको डेढ करोड खोप दिएकोमा धन्यवाद व्यक्त गरेका छन्। उनले यो सहयोगप्रति आभार व्यक्त गर्दै एक चीन नीतिमा प्रतिवद्धता पनि जनाए।

नेपालले चिनियाँ कम्युनिस्ट पार्टीको अनुभवबाट आफूले पनि धेरै कुरा सिक्न चाहेको बताएका थिए। पार्टी निर्माणका क्रममा चीन, चिनियाँ पार्टीको अनुभव र चिनियाँकरण गरिएको मार्क्सवाद अन्तरपार्टी च्यानलमार्फत सिक्न चाहेको बताएका थिए।

चिनियाँ कम्युनिस्ट पार्टीको १९ औँ केन्द्रीय समिति बैठक अन्तर्गतको छैठौं सत्र भोलि सोमबारदेखि सुरु हुँदैछ। उक्त बैठकमा चिनियाँ राष्ट्रपति सी जिनपिङ आठ वर्षअघि सत्तामा आएपछि चीनले हासिल गरेका उपलब्धिको समीक्षा हुनेछ।

चिनियाँ कम्युनिस्ट पार्टी स्थापना भएको एक सय वर्षमा प्राप्त ऐतिहासिक उपलब्धिबारे पनि बैठकमा छलफल हुने कार्ययोजना छ।

नेकपा एकीकृत समाजवादीका अध्यक्ष नेपालले चिनियाँ कम्युनिष्ट पार्टी र त्यहाँका जनता लाई उक्त महत्वपूर्ण सत्रका लागि शुभकामना पनि दिएका छन्।

यसअघि चीनले तत्कालीन नेकपा विभाजित भएर अलग अलग बाटोमा हिँडेका केपी शर्मा ओली र पुष्पकमल दाहाल प्रचण्डलाई फेरि मिलेर अघि बढ्न भनिसकेको छ।