कांग्रेसको १४ औं महाधिवेशनअन्तर्गत रोकिएका अधिवेशन पुन: सुरु

काठमाडौँ — कांग्रेसको १४ औं महाधिवेशनअन्तर्गत चाडपर्वका कारण रोकिएका अधिवेशन शनिबारदेखि पुन: सुरु भएका छन् । तर विवादका कारण अझैपनि कतिपय जिल्लामा अधिवेशन सुरू हुन सकेको छैन ।

केन्द्रीय निर्वाचन समितिका अनुसार शनिबारदेखि वडा अधिवेशन हुन बाँकी रहेका सिन्धुपाल्चोक, रसुवा, रौतहट, डोल्पा, बाँके, कैलाली, सुर्खेत, सप्तरी, सिरहा, धनुषा, महोत्तरी, सर्लाही, बारा र पर्सामा अधिवेशनको प्रक्रिया सुरू हुदैछ । त्यस्तै, शनिबारै सोलुखुम्बु, दार्चुला र म्याग्दीले भने प्रदेश सभा क्षेत्रको अधिवेशन गर्दैछन् ।
यसअघि १८ भदौमा वडा अधिवेशन भएको थियो । त्यो मितिमा वडा अधिवेशन गरेका १३ हिमाली जिल्लाले जिल्ला तहसम्मकै अधिवेशन सम्पन्न गरेका छन् भने ५० जिल्लामा वडा र स्थानीय तहको अधिवेशन भएको छ । वडा अधिवेशन सम्पन्न हुन बाँकी मध्ये सिन्धुपाल्चोकमा ३ वटा वडाको अधिवेशन बाँकी छ । अरु १३ जिल्लामा भने क्रियाशील सदस्यताको विवाद समाधानमा ढिलाई हुँदा अधिवेशन रोकिएको थियो ।

‘सिन्धुपाल्चोकसहित १४ जिल्लामा शनिबारदेखि अधिवेशनको प्रक्रिया अघि बढेको छ । विवादका कारण केही जिल्लामा बाहेक अन्य जिल्लामा प्रक्रिया अघि बढेको छ,’ समितिका सचिव जगन्नाथ श्रेष्ठले इकान्तिपुरसँग भने । उनका अनुसार पर्सा र सर्लाहीमा विवादका कारण अधिवेशनको प्रक्रिया अघि बढेको छैन । निर्वाचन समितिले शनिबार वडा अधिवेशन भएका जिल्लामा ३० कात्तिकमा स्थानीय तह र ३ मंसिरमा प्रदेश सभा क्षेत्रको अधिवेशन गर्ने मिति तोकेको छ ।

निर्वाचन समितिले शनिबारदेखि अधिवेशन थालेका जिल्लालाई १० मंसिरभित्र जिल्ला तहसम्मको अधिवेशन सम्पन्न गर्न समय दिएको छ । ‘हामीले एउटा कार्यतालिका बनाएर दिएका छौँ । त्यहीआधारमा अब जिल्ला कार्यसमिति र निर्वाचन समितिबीचको सहमतिमा अर्को मिति तोकेर पनि अधिवेशन गराउन सकिन्छ,’ समितिका सचिव श्रेष्ठले भने, ‘तर, हामीसँग समय एकदमै थोरै छ । त्यसैले १० मंसिरभित्र जिल्ला अधिवेशन सम्पन्न गर्ने गरी सबैले अधिवेशनको प्रक्रिया अघि बढाउनैपर्छ ।’

निर्वाचन समितिले मंसिर १६ र १७ गते ७ प्रदेशको अधिवेशन गर्ने र २४–२७ मंसिरमा केन्द्रीय महाधिवेशन गर्ने मिति तोकेको छ ।