पाकिस्तानका २ सैनिक अड्डामा आतंकवादीको आक्रमण

काठमाडौं – पाकिस्तानको बलुचिस्तान प्रान्तको नोशकी र पंजगुरमा रहेका फ्रन्टियर कोर (पाकिस्तानी अर्धसैनिक बल) का कार्यालयमा आतंकवादी आक्रमण भएको छ । आक्रमणमा एक सैनिकको मृत्यु भएको छ ।

पाकिस्तानी सेनाको जनसम्पर्क विभागको तर्फबाट जारी एक बयानका अनुसार पंजगुरमा आतंकवादीहरुले २ स्थानबाट अधिकारीहरुको कार्यालयमा प्रवेश गर्ने कोसिस गरे । तर समयमै कारवाही गरेर उनीहरुको प्रयास विफल पारियो । यो आक्रमणमा एक सैनिकको मृत्यु भएको छ र कम्तीमा २ अन्य सैनिक घाइते भएका छन् ।

नोशकीमा रहेको फ्रन्टियर फोर्सको कार्यालयमा पनि आतंकवादीहरुले प्रवेश गर्ने प्रयास गरे तर उनीहरु सफल हुन सकेनन् । यो आक्रमणमा ४ जना आक्रमणकारीको मृत्यु भएको छ । एक जना सैनिक घाइते भएका छन् । नवगठित पृथकतावादी संगठन बलुचिस्तान नेशनलिस्ट आर्मीले ट्वीटरमा एक पोस्ट गर्दै यी आक्रमणको जिम्मेवारी लिएको छ ।

बलुचिस्तानका गृहमन्त्री मीर जियाउल्लाह लंगुले बीबीसीसँग दुवै आक्रमणको पुष्टि गरेका छन् । उनले बीबीसीसँग कुरा गर्दै पंजगुरमा फ्रन्टियर कोर क्याम्प नजिकै विष्फोट भएको बताएका छन् । यसमा ६ सुरक्षाकर्मी घाइते भएका छन् । उनका अनुसार नोशकीमा विष्फोटपछि अपरेशन जारी छ र अपरेशन पूरा भएपछि यसको विस्तृत विवरण दिइनेछ ।