रुस–युक्रेन युद्ध हुने सम्भावना: अमेरिकाले पठायो ३ हजार सैनिक

काठमाडौं – रुस र युक्रेनबीचको तनाव निकै खराब अवस्थामा पुगेको छ । यससँगै अमेरिकाले सेना तैनाथ गर्न सुरु गरेको छ । अमेरिकाले युक्रेनसँग जोडिएका नेटो देशहरुमा आफ्ना तीन हजार सैनिक पठाएको छ । अमेरिकी राष्ट्रपति जो बाइडेनले ३ हजार सैनिकलाई पोल्याण्ड पठाएका छन् । यसअघि नै पोल्याण्डमा १७ सय अमेरिकी सैनिक तैनाथ छन् ।

तनावका बीच आज अमेरिकी राष्ट्रपति जो बाइडेन र रुसी राष्ट्रपति भ्लादिमिर पुटिनबीच टेलिफोनमा कुरा हुँदैछ । एक अमेरिकी रक्षा अधिकारीले युक्रेनमा रुसी आक्रमणलाई लिएर नेटो चिन्तित भएको बताएका छन् । नेटोको चिन्ता कम गर्नकै लागि अमेरिकाले थप सैनिक उठाएको उनले बताए । पेन्टागनले पोल्याण्ड पठाएका यी ३ हजार सैनिक पहिले नर्थ क्यारोलिनाको फोर्ट ब्रेगमा तैनाथ थिए । यी सैनिक अमेरिकाको ८२ औं एयरबोर्न डिभिजनका हुन् ।

अमेरिकाले यी सैनिक रुस र युक्रेनबीच हुने युद्धमा सहभागी नहुने स्पष्ट पारेको छ । यी सैनिकको उद्देश्य नेटो सैनिकलाई प्रशिक्षण दिने र युद्धको स्थितिका लागि तयार राख्ने भएको पेन्टागनले जनाएको छ । नेटो सदस्य देश पोल्याण्डको सीमा युक्रेन र रुस दुवै देशसँग जोडिन्छ । यसअघि अमेरिकी राष्ट्रिय सुरक्षा सल्लाहकार ज्याक सुलिभानले रुसी राष्ट्रपतिले कुनै पनि बेला युक्रेनमाथि आक्रमण गर्ने आदेश दिन सक्ने भन्दै सबै अमेरिकी नागरिकलाई युक्रेन छोड्न भनेका थिए ।

पोल्याण्डमा थप सैनिक पठाउने बाइडेनको आदेशसँगै यसअघि जर्मनीमा तैनाथ रहेका करिब १ हजार अमेरिकी सैनिक रोमानिया पुगेका छन् । यसका अलावा अमेरिकाको १८ औं एयरबोर्न कोरको मुख्यालयबाट ३ सय अमेरिकी सैनिक जर्मनी पुगेका छन् । यी सैनिकको नेतृत्व लेफ्टिनेन्ट जनरल माइकल इ कुरिल्लाको काँधमा छ । नेटो देशहरुकीचको सम्झौताअनुसार अमेरिकाका करिब ८० हजार सैनिक युरोपमा तैनाथ छन् । यीमध्ये केही स्थायी छन् भने केही समयसमयमा स्थानान्तरण भइरहन्छन् ।